Pas 11 vitesh, Shqipëri-Serbi do të “ndeshen” përsëri në fushën e blertë. Dy vende, dy skuadra dhe një histori mes tyre, që elektrizon atmosferën e tifozëve kuqezi.
Sfida do të luhet këtë të shtunë, më 7 qershor, në stadiumin “Air Albania”, në orën 20:45. Kur vetëm një ditë na ndan nga sfida e shumëpritur, gazetari sportiv Alban Xhihani, në emisionin “Aldo Morning Show” në Tv Klan, tha se lojtarët janë të mobilizuar dhe të karikuar në maksimumin e tyre.
Sipas Xhihanit, synimi i Kombëtares Shqiptare nuk është thjesht që të mundim Serbinë, por të arrijmë pikët e nevojshme që do të na hapin rrugën drejt kualifikimit në Kampionatin Botëror të Futbollit.
Alban Xhihani: E para është organizimi dhe e dyta është rezultati. Me sa po shoh, për organizimin po bëhet maksimumi, sepse është një lloj sfide, ku edhe drejtues të UEFA-s, si organizatorë të këtij eventi, janë aty.
Aldo: Nesër, si parashikohet ndeshja?
Alban Xhihani: Këto janë ndeshje që për futbollistët apo për trajnerin janë ndeshje të cilat ndoshta përgatiten më lehtë, sepse kanë atë dozën e duhur të karikimit, të përqendrimit. Disa prej lojtarëve kanë lindur në Kosovë, apo kanë origjinë kosovare, kështu që këtu ata janë më shumë se 100% të karikuar, të mobilizuar për të dhënë maksimumin e tyre. Absolutisht, por sidomos kjo pjesë e futbollistëve. Plani nuk është vetëm që të mundim këtë skuadër edhe kaq mbaroi, por është delikat për atë që ne kemi si synim, që është arritja e vendit të dytë në grup, që na jep një shans tjetër për të na kualifikuar në Kampionatin Botëror. Sepse do të kemi edhe dy ndeshje ekstra, në të cilat ne do të synojmë që të kapim sfidën e Kampionatit Botëror.
Sfida Shqipëri-Serbi do të transmetohet live dhe ekskluzivisht në ekranin e Televizionit Kombëtar Klan.
