Paqëndrueshmëria e kursit të këmbimit në raport me monedhën tonë kombëtare nuk e ka stepur përdorimin e gjerë që po njeh monedha europiane në pagesat përmes sistemeve bankare. Kjo konfirmohet nga shifrat e Bankës së Shqipërisë, e cila raporton se deri në fund të muajit korrik, transaksionet në monedhën euro pësuan rritje me rreth 22.7%, krahasuar me të njëjtën periudhë të një viti më parë.
Rritja e numrit të transaksioneve është shoqëruar edhe me rritje të vlerës së pagesave të kryera në euro. Më konkretisht, në 7 muajt e parë të këtij viti janë kryer transaksione që përllogariten në vlerën e 3.5 miliardë eurove, nga të cilat 556.4 milionë vetëm në muajin korrik.
Ekspertët e ekonomisë e lidhin këtë prirje me rritjen e ndjeshme të numrit të turistëve të huaj, që sjellin në treg kërkesë më të madhe për shërbime dhe produkte të paguara në euro. Por, sipas tyre, përdorimi i gjerë i euros është tashmë një fenomen i konsoliduar në ekonomi, sidomos në blerje të mëdha, pagesa shërbimesh dhe transaksione të përditshme, duke reflektuar gjithnjë e më shumë ndikimin e integrimit të tregut vendas me atë europian.
Tv Klan
