Një miqësore që tregoi shumë gjera, një miqësore që pritet ti shërbejë shumë trajnerit De Biasi në vigjilje të Kampionatit Evropian. Kundër Ukrainës mbi të gjitha treguam se jemi një skuadër shumë e prekshme në mbrojtje, pësojmë gola nga “tuneli”, praktikisht edhe sot pësuam gol në çdo aksion që Ukraina krijoi.
Kjo ishte pjesa e “errët” pjesa e bukur ishte dëshira dhe agresiviteti i lojtarëve, të gjithë japin gjithçka në fushë. Të shtyrë dhe nga afro 12 mijë tifozë të pranishëm në stadium ekipi kombëtar prodhoi një futboll të kënaqshëm, mesfusha dhe sulmi funksionuan duke e ngjeshur kundërshtarin në pjesën më të madhe në gjysmëfushën e tyre. Rezultati në fund nuk ishte korrekt, për atë që dy skuadrat dhanë në fushë, mbase meritonim diçka më shumë nga kjo miqësore e fundit.
PJESA E PARE
Ashtu siç ka ndodhur rëndomtë në sfidat e fundit, Shqipëria pëson gol në minutat e para, kështu ndodhi edhe përballë Ukrainës. Në aksionin e parë djemtë kuqezi ndëshkohen në minutën e 9-të. Një hezitim në mbrojtje i dha mundësinë Stefanenkos të shënonte golin e avantazhit.
Të shtyrë nga mira tifozë në stadium, ekipi jonë Kombëtar reagoi shumë shpejt, duke rikthyer baraspeshën pas vetëm 3 minutash lojë.
Një zbritje e shpejtë dhe një finalizim perfekt i Sadikut solli golin e barazimit mbi të gjitha festën në stadium.
Shqipëria ushtron presion të vazhdueshëm në portën e Ukrainës duke e spostuar totalisht ekipin kundërshtar në gjysmëfushën e tyre. Në minutën 36-të, Sadiku kishte mundësinë më të mirë për të shënuar dhe golin e dytë.
Nëse nuk do të ishte për atë gol të shënuar nga Stefanenko në minutën e 9’, pjesa e parë e Shqipërisë do të cilësohej si perfekte. Skuadra e Gianni De Biasit shfaqi një futboll mjaft të bukur, duke qenë dominues ndaj një kundërshtari shumë prestigjioz si Ukraina.
Si gjithnjë pjesa më e bukur e ekipit tonë kombëtar mbeten tifozët, të cilët gjatë gjithë kohës mbështetën dhe shtynë ekipin kombëtar në kërkim të fitores.
PJESA E DYTE
Shqipëria ndëshkohet sërish me fillimin e pjesës së dytë. Jarmolenko kalon Ukraninën në avantazh në minutën e 49-të.
De Biasi e nisi pjesën e dytë me tre ndryshime të menjëhershme duke hedhur në fushë Ajetin, Memushaj dhe Bashën, por problemi mbetet i njëjtë ndëshkohemi në rastin e parë, në aksionin e parë.
Shqipëria hidhet e gjitha në sulm, nuk ka miqësore në këtë sfidë. Lenjani godet shtyllën pingule duke flirtuar me golin, një shenjë e pastër që askush nuk dëshiron të dalë i humbur nga kjo sfidë.
Imazhi i një ekipi të bukur zbehet akoma më shumë pas golit të tretë të pësuar në minutën e 87-të. Konoplyanka shënon dhe golin e tretë për Ukrainën duke “firmosur” në problemin më të madh që ka Shqipëria, mbrojtjen./BW
