Një stadium që nuk mbushet plotësisht për herë të parë ndodhte në “Elbasan Arena” në një sfidë të Kombëtares, me tifozët duke dhënë kështu “leksione” ndaj masave të sigurisë dhe situatës së krijuar, duke bërë një minibojkot. Flakadani i hedhur në fushë që vrenjt fytyrën e presidentit Duka, si edhe kryebashkiakja e Shkodrës që “konverton” ftesën nga “Loro Boriçi” në “Elbasan Arena”.
Dy tifozë izraelitë që valëvisnin flamurin e tyre në tribunë, me njërin prej tyre që këndonte këngë shqip, si edhe takimi i Tramexanit me tenorin Kastriot Tusha para këndimit të himnit. Si për ironi, mbrëmë nuk dominuan ngjyrat kuq e zi, por ato verdhë e blu dhe portokalli, simbolet e qytetit të Elbasanit, për shkak të mbrojtësve nga shiu.
Të gjitha këto dhe jo vetëm ishin disa nga pikantet e sfidës së mbrëmshme, të cilat nuk u vunë re në TV.
Hyrja në stadium
Hyrja e tifozëve nisi rreth tri orë para fillimit të sfidës, ku para se të futeshin në stadium kaluan disa kontrolle të rrepta, ashtu siç edhe ishte paralajmëruar më parë nga policia.
9200 tifozë
Gazeta “Panorama Sport” ka mësuar se në stadium kanë qenë rreth 9200 tifozë. Kjo, në bazë të të dhënave nga burime pranë FSHF-së që kanë bërë me dije edhe numrin e biletave të shitura.
Ngjyrat verdhë e blu
Në pjesën më të madhe të ndeshjes dhe para saj shiu nuk pushoi, duke detyruar sportdashësit të vishnin mushamatë. Për fat të keq nuk ishin të kuqe, për të krijuar edhe mundësinë që të shërbenin për dekorin e ngjyrave të Kombëtares. Gjithsesi, dominuan ato të qytetit të Elbasanit dhe kësaj skuadre, verdhë e blu dhe portokalli, duke bërë që për herë të parë në stadium të mos dominonin ngjyrat kuq e zi. Edhe pse ishte një mot i ftohtë, një pjesë e tifozëve edhe u zhveshën duke sfiduar edhe kohën.
Tifozët izraelitë
Edhe pse nuk pati tifozë izraelitë të organizuar, në tribunë mund të numëroje ndonjë tek-tuk. Madje, një tifoz shqiptar kërcente në tribunë me flamurin izraelit, duke kënduar këngë patriotike shqip. Paksa e çuditshme. Më tutje ishte edhe një në moshë më të thyer me një flamur të Izraelit. Sigurisht, ata dolën më të gëzuar se mijërat e tjerë në stadium, sepse Izraeli fitoi ndeshjen.
Nxehja
Në momentin që lojtarët po bënin nxehjen e zakonshme përpara sfidës, De Biazi vendosi që edhe lojtarët e stolit mund të stërviteshin. Kjo ndoshta për shkak të motit të ftohtë, sepse nuk është një situatë që ndodh shpesh, për të mos thënë fare. Ndërsa izraelitët nxorën në nxehje vetëm ekipin e formacionit.
Apeli dhe himnet
Në momentin që spikeri në stadium thërriste emrat, kishte ovacione dhe thirrja e mbiemrit në kor nga sportdashësit për lojtarët e Kombëtares, ndërsa për ata izraelitë vetëm vërshëllima. E njëjta gjë ndodhi edhe me himnin kundërshtar, i cili u “refuzua” nga tifozët. Kjo më shumë për shkak të situatës së krijuar me sigurinë, sesa për armiqësinë me skuadrën kundërshtare.
Flakadani
Përpos supermasave nga ana e policisë për këtë ndeshje, një tifoz ia doli t’u shpëtojë kontrolleve duke marrë një flakadan me vete. Gjatë këndimit të himnit shqiptar mori guximin edhe për ta hedhur në fushë. Një moment ky që u shoqërua me një vrenjtje të fytyrës së Armand Dukës. Për fat, ishte i vetmi moment kur u hodh një send i ndaluar në fushë.
Trajnerët
Kanë vendosur të bëjnë sjellje të ndryshme trajnerët në këtë sfidë, me Xhani De Biazin që preferoi të mos ngrihej në këmbë për të dhënë udhëzimet e tij. Vetëm në ndonjë rast sporadik e bënte këtë gjë. Ndryshe nga ai, homologu Elisha Levi pothuajse gjatë gjithë kohës qëndroi në këmbë për të dhënë udhëzimet, edhe pse shiu e shoqëroi në pjesën më të madhe të ndeshjes.
Takimi
Para këndimit të himneve të dy ekipeve, ndihmësi i De Biazit, Paolo Tramexani, shkoi për të takuar tenorin Kastriot Tusha, i cili po bëhej gati të këndonte himnin shqiptar së bashku me dy ndihmësit e tjerë.
Tribuna VIP
Në tribunën VIP nuk mungoi as ministri i Brendshëm, Sajmir Tahiri, por ajo që ra më shumë në sy ishte prania e kryebashkiakes së Shkodrës, Voltana Ademi. Me sa duket, kryebashkiakja nuk ka dashur ta “djegë” ftesën dhe ka bërë konvertimin nga “Loro Boriçi” në “Elbasan Arena”, ndryshe nga shumë shkodranë që e refuzuan të vinin në stadium për këtë ndeshje.
Largimi
Në momentin që Shqipëria pësoi golin e dytë të ndeshjes, tifozët filluan të boshatisnin stadiumin. Ca për shkak të mërzitjes së rezultatit dhe të tjerë për faktin se duke u futur që në orën 17:30, kishin shumë orë që qëndronin në stadium. Më pas, në golin e tretë të pësuar, stadiumi pothuajse u boshatis fare.
Arbitri
Për tifozët, arbitri gjerman i ndeshjes e bëri “baltë” me vendimet që dha, dy të kuq dhe dy penallti kundër skuadrës sonë Kombëtare. Ndaj, tifozët ia “shpërblyen” me sharje në kor. Për fat të mirë ishin në gjuhën shqipe dhe gjyqtari nuk kuptonte gjë! Përveç arbitrit, ofendimet në kor nga tifozët nuk kanë munguar edhe në adresë të presidentit të FSHF-së, Armand Duka./ Panorama.al Vladimir Mema
