Byroja e Kuvendit ka marrë vendim ditën e sotme që të përjashtojë me 5 ditë nga punimet e Kuvendit deputetin socialist, Erjon Braçe për incidentin e ndodhur të enjten e shkuar në Kuvend.
Mësohet se bashkë me të janë përjashtuar po me 5 ditë nga Kuvendi edhe Edi Paloka, Arben Ristani dhe Roland Keta, deputetë të PD-së.
Ndërsa deputeti Sali Berisha ia ka hedhur paq me një vërejtje.
Incidenti nisi javën që shkoi kur Erjon Braçe acaroi atmosferën në sallën e Kuvendit teksa u përplas verbalisht me ish-kryeministrin Berisha dhe deputeten Topalli.
Më pas, Ristani, Paloka e Keta tentuan që ta largonin nga foltorja, por ndërhynë truprojat e Gardës për të parandaluar konfliktin fizik.
Nga njëra anë, PS-ja kërkoi që të përjashtohen nga Kuvendi deputetët Berisha, Ristani, Paloka e Keta, ndërsa opozita kërkoi përjashtimin e Braçes me 10 ditë, duke pretenduar se ka përdorur një fjalor të ulët ndaj grave deputete të PD-së.
