Në 3 Shtator, në vigjilje të ceremonisë së shenjtërimit të Nënë Terezës, në koncertin që zhvillohet me këtë rast, do të këndojë edhe shqiptarja me famë botërore, Rita Ora.
Rita do të performojë këngën “What child is this”, e shkruar nga William Chatterton Dix, në 1865 por që do të orkestrohet nga Shpëtim Saraçi, në Vatikan.
Ka qenë dirigjenti i njohur Bujar Llapaj, i cili do të drejtojë koncertin homazh në Vatikan, ai që e ka kontaktuar Saraçin dhe i ka kërkuar të bëjë një transkriptim të këngës që Ora do të këndojë.
“Ky, ky është Krishti Mbret/ që barinjtë e ruajnë dhe engjëjt i këndojnë/shpejtoni, shpejtoni t’i çoni lavdi/ foshnjës, birit të Marisë!”.-janë vargjet e një prej himneve më të bukura të Krishtlindjes, që i është besuar Ritës.
Këtë këngë Rita Ora e ka interpretuar në një duet me tenorin e madh italian Andrea Bocelli, në dhjetor të vitit 2015, drejtpërdrejt në ekranin e RAI 1, por këtë herë ajo do të jetë e vetme në skenë dhe ka preferuar një tjetër orkestracion.
