Një shpërthim i fuqishëm tronditi zonën pranë ish – Fushës së Aviacionit të Tiranës, rreth orës 03:00 të mëngjesit të së martës. Makinës së një 34 – vjeçari i është vendosur një sasi lënde shpërthyese.
Sipas policisë, ngjarja ndodhi në parkimin e një pallati, ndërsa dyshohet se është përdorur rreth 100 gramë eksploziv.
Nga shpërthimi janë shkaktuar vetëm dëme materiale, ku është dëmtuar lehtë parakolpi e mjetit tip “Chervolet”, në pronësi të Florian Papadhimitri, me profesion gazetar.
Pronari i këtij automjeti është marrë në pyetje nga policia.
Ai ka deklaruar se nuk ka asnjë dyshim rreth autorëve të ngjarjes dhe se nuk ka konflikte me askënd. 34 – vjeçari i ka thënë grupit hetimor se dyshonte që autorët të kenë ngatërruar objektiv.
Grupi hetimor ka marrë edhe dëshmitë e familjarëve të tjerë për ngjarjen.
Pjesë nga shpërthimi në vendin e ngjarjes dhe automjeti po verifikohen nga ekspertët. Njëkohësisht, po verifikohen edhe kamerat e sigurisë në atë zonë, për të përftuar ndonjë të dhënë për zbulimin e autorëve.
