Zbulimi i hetuesve gjerman se një ekip ukrainas hodhi në erë tubacionet e gazit natyror Nord Stream ndërsa përdorte Poloninë si bazë logjistike, kanë shfaqur mosmarrëveshjet midis Berlinit dhe Varshavës, dy aleatët e SHBA që mbështesin Ukrainën në luftën me Rusinë.
Kryeministri polak Donald Tusk kritikoi Gjermaninë, pasi një hetim gjerman gati dy-vjeçar zbuloi se një ekip ukrainas sabotuan sistemin më të madh të tubacioneve në det të hapur në shtator 2022. Operacioni përfshinte një jaht të vogël me qira dhe një ekip prej gjashtë anëtarësh, thekson media amerikane Wall Street Journal.
Autoritetet në Poloni nuk bashkëpunuan për ekstradimin e të dyshuarit ukrainas duke i lënë këtij të fundit të largohet në Ukrainë duke shkaktuar një protestë nga Gjermania.
Në një postim në X, Tusk vuri në shënjestër “iniciatorët dhe klientët” e Nord Stream 1 dhe 2, tubacionet binjake që kalonin paralelisht në shtratin e detit Baltik, duke transportuar gazin rus në Evropën Perëndimore.
“E vetmja gjë që duhet të bëni sot për këtë është të kërkoni falje dhe të heshtni”, tha ai. Moska paraqiti një ankesë në Gjermani për mungesë progresi në hetimin e Nord Stream dhe kërkoi bisedime urgjente rreth “përmbushjes së detyrimeve ndërkombëtare nga Gjermania në luftën kundër terrorizmit”, tha Ministria e Jashtme ruse.
Më 2 korrik, një grup ministrash të kabinetit gjerman, të udhëhequr nga kancelari Olaf Scholz, vizituan Varshavën për një seancë të përbashkët me qeverinë e Tusk.
Atje, ministrat gjermanë kërkuan nga homologët e tyre polakë që të siguroheshin që urdhër-arresti të ekzekutohej, sipas një personi të njohur me diskutimet, por polakët refuzuan, thekson Wall Street Journal.
