Nga shtrati i katit të tretë të repartit të Dijegie-Plastikës, 35-vjeçari Mariglen Muçka tregon momentet fatale të shpërthimit të bombolës në lokalin e fshati Beragozhdë. “Po festonim si çdo natë në lokalin e vetëm të fshatit dhe dikush luante shah, tavëll apo letra dhe të tjerë shikonin ndonjë film a telenovelë”-e nis rrëfimin e tij i plagosuri. Në krahun e djathtë të tij gjendet i shtruar Apostol Muçka, babai 57-vjeçar i Mariglenit, i cili ka djegie më të rënda, kryesisht në fytyrë.
Të dy thanë se nuk e kishin ndier gazin që kishte rrjedhur nga bombola që ndodhej në kuzhinë. Çastet e shpërthimit ata i përshkruajnë me frazat “na u duk si bombë, dukej si luftë, sikur i kishin vënë tritolin, aq zhurmë e madhe ishte”. Marigleni vijon rrëfimin duke thënë se “lokali u mbush plot me shtëllunga të mëdha zjarri, ca rrathë të kuq vërtiteshin brenda sallës dhe ndjeva që flakët po më digjnin fytyrën”. Më tej, 35-vjeçari kishte ulur kokën poshtë dhe ashtu këmbadorazi ia doli të dilte jashtë. “U tërhoqa zvarrë, gjersa dola. Secili mundohej vetë të shpëtonte.
Ulërinin me të madhe nga dhimbjet”, -shton ai. Nga ana tjetër i ati, Apostoli shprehet se “shyqyr që lokali kishte shumë dritare dhe forca e shpërthimit doli disi nëpërmjet thyerjes së xhamave se po të ishte më shumë i izoluar, do të kishim vdekur aty brenda, do të piqeshim të gjallë. Ishte fati ynë që shpëtuam”. Gjithçka në lokal kishte fluturuar në ajër, pjata, karrige e tavolina. Të dy të plagosurit shtuan se familjarët i kishin dërguar të lënduarit në spital, me mjetet e tyre.
Emrat dhe gjendja shëndetësore
Në katin e tretë të dermatologjisë, në gjendje më të mirë shëndetësore ndodhen 8 persona. Ata janë Mariglen dhe Apostol Muçka, babë e bir, respektivisht 35 dhe 57 vjeç, Erald Dulollari, 21 vjeç; Leonard Hamolli, 26 vjeç; Jani Pera, 36 vjeç; Aldi Fraholli, 20 vjeç; Andrea Fraholli dhe Renato Hamolli, 37 vjeç.
Sipas mjekëve, ata kanë djegie nën 20 për qind dhe do të rikuperohen shumë shpejt. Në reanimacion mbërritën në total 19 persona, ku dy prej tyre kanë djegie në mbi 50 për qind të trupit. Emrat e këtyre 19 personave janë Florenc Fraholli, 28 vjeç; Drilon Hamolli, 25 vjeç; Xhulian Spahollari, 17 vjeç; Klodian Dumani, 32 vjeç; Ilir Muça, 29 vjeç; Musa Spahollari, 54 vjeç dhe Gentian Dumani, 28 vjeç. Më tej, të plagosur janë edhe Vasfi Frahollari, 49 vjeç; Eri Hamolli, 14 vjeç; Arian Fraholli, 16 vjeç; Gentian Muçka, 36 vjeç; Agjerim Muçka, 47 vjeç; Enkel Fraholli, 29 vjeç; Vladimir Muçka, 33 vjeç dhe Mariglen Fraholli, 22 vjeç. Në gjendje më të përmirësuar janë Erald Dulollari, 21 vjeç; Eriol Fraholli, 26 vjeç; Andrea Fraholli, 22 vjeç; Arian Muçka, 37 vjeç; Gentian Muçka, 36 vjeç; Elson Fraholli, 25 vjeç dhe Reshit Muçka, 55 vjeç. /gazeta Shqip/
