Një shpërthim me lëndë plasëse mësohet të ketë ndodhur mbrëmjen e 4 Janarit në qytetin e Shkodrës.
Sipas njoftimit paraprak të policisë rreth orës 21:45 në lagjen “Guerrile” të Shkodrës, një sasi lënde plasëse ka shpërthyer në pjesën e pasme të banesës së shefit të stacionit të Policisë Theth, Prel Milani.
Si pasojë e këtij shpërthimi kanë rezultuar vetëm dëme materiale dhe fatmirësisht nuk ka patur të lënduar në njerëz.
Ende nuk dihen motivet e kësaj ngjarje, ndërkohë forcat e policisë kanë nisur hetimet për kapjen e autorit/autorëve dhe zbardhjes së saj.
Përveç shpërthimit në banesën e shefit të policisë së Thethit, Prel Milani, Shkodra është tronditur mbrëmjen që lamë pas nga një tjetër shpërthim.
Pak orë pas ngjarjes së parë një sasi e konsiderueshme lënde plasëse e dyshuar si tritol, i është vendosur banesës së pronësi të Kolë Bungajës nga fshatin Grudë e Re.
Në çastin kur ka ndodhur shpërthimi anëtarët e familjes ishin në gjumë. Fatmirësisht nuk ka patur të lënduar nga shpërthimi, por vetëm dëme materiale.
Nuk dihen ende shkaqet lidhur me këtë ngjarje, ndërkohë që policia po vijon hetimet për të dy shpërthimet e ndodhura në Shkodër.
Njoftimi i policisë:
Më datë 04.01.2020, rreth orës 21:45, në lagje “Guerrile” Shkodër, mbrapa banesës së shtetasit P. M. me detyrë shef i Stacionit të Policisë Theth, Shkodër, ka shpërthyer një sasi lëndë plasëse, për pasojë ka vetëm dëme materiale. Menjëherë në vendngjarje kanë shkuar forcat e Policisë dhe grupi hetimor ku vijon veprimet për sqarimin e rrethanave të ngjarjes, identifikimin dhe kapjen e autorit./Opinion.al/
