Fituesi i Botërorit të Klubeve 2025 mund të përfitojë deri 125 milionë dollarë, shuma më e lartë e dhënë ndonjëherë për një turne të tillë ku numri maksimal i ndeshjeve për secilin lojtar është 7.
FIFA bëri të ditur mënyrën se si do të shpërndahen shpërblimet që në total kapin 1 miliard Dollarë për 32 pjesëmarrësit.
Bonuset për rezultatet dhe kalimin e çdo faze do të jenë fikse, 475 milionë dollarë në total, ku vetëm të fitosh takimin final vlen 40 milionë, ndërsa 30 shkojnë për humbësin.
Shpërblime do të ketë edhe në bazë të vlerës tregtare dhe paraqitjet sportive, ndër vite 525 milionë dollarë në total, ku ekipet Europianë përfitojnë më shumë.
FIFA ka bërë të ditur që nuk do të mbajë asnjë të ardhur nga ky aktivitet madje do të shpërndajë edhe 250 milionë dollarë të tjerë për klubet në të gjithë botën, në formë mbështetje.
Botërori i Klubeve që zhvillohet për herë të parë në këtë format me 8 grupe me nga 4 ekipe secili do të mbahet nga 14 qershor deri në 13 korrik të këtij viti në Shtetet e Bashkuara të Amerikës.
