Pas denoncimit të bërë nga partia ‘Mundësia’ për shpalljen e pavlefshme të disa fletëve të votimit, situata tek qendra e numërimit pranë shkollës ‘Sami Frashëri’ në Tiranë paraqitet e tensionuar.
Kryetari i kësaj partie, Agron Shehaj pati një përplasje me nënkryetarin e KZAZ, pasi ai urdhëroi që vëzhguesit e partive politike të dalin jashtë QV.
Siç duket edhe nga pamjet, efektivët e Policisë po nxjerrin jashtë ambienteve të numërimit të votave vëzhguesit, gazetarët dhe operatorët e mediave.
Por Shehaj ka kërkuar të qëndrojë brenda në QV dhe të shohë fletët e votimit të partisë Mundësia që numëruesit i konsideruan të pavlefshme.
Sipas numëruesve bëhet fjalë për 3 vota të partisë Mundësia që janë konsideruar të pavlefshme, për shkak të ngjyrës së zbehtë të fletës së votimit.
Mbi këtë rast mësohet se është lajmëruar edhe kreu i KQZ-së, Ilirjan Celibashi.
