Pak ditë më parë katër aktivistë u shoqëruan nga policia, gjë e cila ngjalli reagimin e “Aleancës për Mbrojtjen e Teatrit Kombëtar”.
Lidhur me këtë ngjarje ka folur regjisori, Robert Budina, në një intervistë për “A2”. Ai është shprehur se njëri prej aktivistëve të shoqëruar është dhunuar në komisariat.
Në lidhje me shembjen e Teatrit Kombëtar, Budina theksoi se ai do të rindërtohet, ndërsa shtoi se dhe eksponentë të mazhorancës, duan ta rikthejnë teatrin.
“Aktivistët e teatrit ndërhynë për të filmuar ngjarjen dhe policia nuk i rezistoi dot këtij veprimi fare demokratik. Ndërhynë ndaj atyre që filmonin, i shoqëruan në komisariat, i morën celularin, që merret vetëm në komisariat. Aty pastaj kanë goditur me shkelm në fytyrë njërin prej nesh. Kjo është një polici politike që nuk ndërhyn ndaj keqbërësve, por ndaj protestave. Nuk zbaton ligjin dhe nuk e njeh ligjin. Ne do t’i ndjekim penalisht këta njerëz, për të vërtetuar që njerëzit nuk duhet të bëhen vegla të një urdhri që nuk ka bazë ligjore. Ne ishim në rutinën tonë të përditshme, po shkonim aty ku bëjmë “live”-n përditë. Ne do ta rikthejmë teatrin, kemi sinjale të qarta që edhe vetë ata, eksponentë të mazhorancës, duan ta rikthejnë teatrin, por duan ta bëjnë të duket sikur po e kthejnë ata. Po përpiqen që të tregohen qeveri që mirëkupton. Do të kthehet ashtu siç ishte, aty ku ishte, por do ta kthejnë qytetarët që janë me të drejtën”, u shpreh Budina./ Opinion.al
