Shoqata Kombëtare e Gjyqtarëve reagoi pas vendimit të ambasadës amerikane për revokimin e vizave për 23 gjyqtarë dhe prokurorë në vend, duke thënë se vizat nuk shërbejë si etalon matjeje dhe as si kriter për vendimmarrjen e organeve që do të realizojnë procesin e vetingut.
“Nuk mund të vazhdohet të mbahen mbi supe sulmet e padrejta dhe akuzat e fryra që aktorë publike dhe segmente të caktuara janë duke bërë ndaj organeve të drejtësisë, duke na konsideruar si zyrtarë që nuk e duam reformën”, thuhet në deklaratën e shoqatës.
Duke u radhitur si dashamirës të reformës, shoqata kombëtare kujton se njerëzit e drejtësisë kanë dhënë kontribut në përgatitjen e kuadrit ligjor. Por duke u shprehur të keqardhur, gjyqtarët konstatojnë se kur reforma është afër, presioni ndaj funksionarëve të sistemit të drejtësisë po rritet gjithmonë e më tepër. “Kemi theksuar që në fillim të kësaj reforme se, organet e drejtësisë në vend, padrejtësish janë etiketuar si “pjesa e sëmurë” e organizmit shtetëror dhe e keqja që duhet luftuar. Kjo frymë anti-institucionale ka ardhur në rritje, deri në pikën që tashmë reforma po konceptohet si një reformë kundër sistemit të drejtësisë dhe jo reformë për sistemin e drejtësisë”, thuhet më tej.
Por, sipas gjyqtarëve, retorika që po përdoret ndaj sistemit dhe sidomos ajo e anulimit të vizave ka mundësi të amplifikohet dhe të shërbejë si mjet presioni ndaj organeve të reja kushtetuese.
