Në takimin që u zhvillua ditën e djeshme midis Skënderbeut dhe Partizanit, deputeti socialist Erjon Braçe akuzohet nga Shoqata e Arbitrave se ka goditur me sende të forta arbitrin kryesor të takimit.
Deputeti socialist ndodhej në zonën VIP të stadiumit dhe thuhet se ka goditur me çakmak arbitrin e takimit Andi Koçi, në momentin kur po futej në dhomat e zhveshjes.
“Shoqata e Arbitrave dënon një veprim të tillë nga ana e përfaqësuesit të ligjit, në drejtim të arbitrave, dhe njëherësh bën apel për më shumë gjakftohtësi dhe vetëkontroll, jo vetëm në këtë periudhë të mbetur ndeshjesh, por edhe në vijimësi. Ngjarja e fundit ishte e shëmtuar, aq më shumë kur të tilla veprime vijnë nga tribuna VIP. Të tilla situata nuk i përkasin aspak futbollit, dhe për më tepër marrin një simbolikë antisportive kur ideohen dhe kryhen nga një përfaqësues i ligjit”.
Erjon Braçe është tifoz i ekipit të Partizanit.
Lidhur me reagimin e tij, deputeti socialist është përplasur edhe më parë me tifozë të skuadrave të tjera.
