Në prag të sfidës mes “Çolizmit” dhe Tiki-Taka-s ka ardhur një deklaratë e fortë nga një trajner italian: “Barcelona dhe Guardiola kanë krijuar disa përbindësha në klubet e tjerë dhe në mendjet e trajnerëve”. Këto kanë qenë fjalët e Gennaro Gattuos-s, kampion i botës me Italinë dhe dy herë i Europës me Milan-in si futbollist, tani trajner i Pisa-s. Nëse nuk është kuptuar, edhe ai, ashtu si Trapattoni, preferon Atletico-n e Smieone-s para Bayern-it të Pep Guardiola-s. Ish-milanisti, në të vërtetë, nuk ka folur për gjysmëfinalen e Champions-it, por ka prekur temën e nxehtë të krizës që po kalon futbolli italian, që sipas tij, “kohët e fundit ka dalë nga vetja”.
“Është munduar të kopjojë të tjerët, – ka shpjeguar ish-milanisti, – duke humbur një pjesë e kulturës mbrojtëse, që ka lidhje me markimin dhe me aftësinë e portierit. Duhet ndryshuar, kjo është e drejtë, por pse të mos bëhet duke ruajtur atë karakteristikë që e kemi shfrytëzuar aq mirë në këto vite? Nga ana tjetër kemi fituar katër Kupa të Botës. Sot shumë trajnerë, që kanë dalë nga Coverciano, po bëjnë një punë të mirë, për këtë arsye nuk mund të themi se gjithçka po shkon keq. I keni parë si luajnë ekipet e Mourinho dhe Simeone?”.
“Për të bërë këtë profesion nuk mjafton të kesh qenë një lojtar i madh, – ka shtuar Gatusso. – Duhet të kuptosh se cilin ke përpara, të shprehesh në mënyrën e duhur dhe të jesh koherent. Sipas mendimit tim është më e lehtë të luash futboll se sa të jesh trajner. Mungojnë talentet? Sot të rinjtë tanë luajnë dhe stërviten 10 orë në javë, më pak se në Holandë, ndërsa në të kaluarën ne luanim 10 orë në ditë. Ndoshta kjo është një nga arsyet pse nuk ka më talente. Sot kemi fenomen në aspektin teknologjik me celular dhe play station dhe më pak fenomen në futboll”, ka përfunduar Gattuso.
