Gazetari Armand Shkullaku nëpërmjet një shkrimi në “Lapsi.al” ka theksuar se shpallja nga Ben Blushi e projektit të tij politik, ‘Libra’ ka nxjerrë në pah edhe njëherë falsitetin e Rilindjes dhe gjendjen dëshpëruese në të cilën jemi kurthuar.
Edi Rama, nëpërmjet Taulant Ballës, e cilësoi partinë e Blushit “një pjellë të Partisë Demokratike”. Një gjuhë padyshim e shpifur, urrejtëse, e ulët, por që nuk është shqetësuese vetëm për këtë. Ajo që është tronditëse kur e mendon, ka të bëjë me faktin se edhe pas 26 vitesh pluralizëm dhe shoqërie të hapur, pas çerek shekulli kontaktesh dhe marrëdhëniesh me botën e qytetëruar, përsëri përdoren metodat dhe komunikimi primitiv, diversioni pervers, akuzat për shitje tek armiku (i brendshëm ose i jashtëm) dhe goditjet bizantine ndaj kundërshtarit.
Sipas Shkullakut, sjellja ndaj rastit Blushi është dëshmi e gjendjes gati të pashpresë për të dalë nga mentaliteti totalitar dhe primitiv që, izolimi, komunizmi dhe lufta për pushtet, e kanë rrënjosur aq thellë sa edhe ata që nuk e kanë përjetuar sillen njësoj si pionerët apo heronjtë e gjallë të Enverit.
Ndërsa thekson, se me të njëjtën logjikë e përjetojnë dhe përballen me kundërshtarin brenda llojit, me atë që mendon e vepron ndryshe, me atë që zgjedh një rrugë tjetër, me atë që refuzon të mendojë si ata apo si shumica.
Sepse besojnë se partia është e tyre e për rrjedhojë Shqipëria është vetëm e tyre, që kush del kundër partisë është armik i popullit, që kush rrezikon pushtetin e tyre është tradhtar, agjent, pjellë e të keqes apo pjesë e të keqes.
