Para Gjykatës së Posaçme, ish-ministri i drejtësisë, Aldo Bumçi mohoi faktin që t’i ketë përcjellë Ministrisë së Mbrojtjes në vitin 2007 një shkresë me shënimin “për z. Shkëlzen Berishën”.
Zoti Bumçi tha se shënimi me shkrim dore nuk është i tij dhe se ai dokument ishte i falsifikuar.
“Shkresa në fjalë, e datës 09.03.2007, ishte dërguar me herët me postë dhe me fax për në Ministrinë e Mbrojtjes. Ndërsa shkresa me shënimin me shkrim dore është dërguar disa ditë më vonë. Asnjë fax nuk është dërguar nga unë, asnjëherë, për asnjë ministër. Ministri firmos shkresa, që më pas protokollohen dhe dërgohen. MM e ka pasur shkresën 5 ditë para mbërritjes së faksit me shënim. Unë kam bërë kallëzim penal dhe kam kërkuar akt ekspertim kaligrafik. Shkëlzen Berisha nuk ka punuar ndonjëherë në Ministrinë e Mbrojtjes. Ja po e marrim të mirëqenë se do të flisja me Shkëlzen Berishën. Këtë do ta bëja me fax? Kisha mënyra të tjera kontakti. Ajo është një falsifikim, vetëm për të mbajtur gjallë një çështje politike”, tha Bumçi para gazetarëve.
Bumçi tha se e ka takuar Shkëlzen Berishën, por shumë rrallë.
“Takimet me të kanë qenë të rralla, kryesisht gjatë fushatave zgjedhore. Kur isha në ministri ka ardhur shumë rrallë, 1 ose 2 herë, por për arsye që lidheshin me fushatën zgjedhore”, shtoi ai.
