Eshtë një refren i njohur që përsëritet çdo vit: “Shkollat publike nuk kanë ngrohje”. Nuk ka shqiptar që nuk e di këtë. Lajm do të ishte e kundërta…
Por, sot lajmin e bën kjo foto: Nxënësi me dru në qese, rrugës për në shkollë… Eshtë shkrepur mëngjesin e sotëm në Bicaj të Kukësit dhe është postuar në facebook nga gazetari Artur Kurtallari.
Fotoja e “djalit me dru” u bë ‘hit’ brenda ditës duke u shpërndare me qindra herë në rrjetet sociale.
Gazetari që shkrepi foton përmes një shënimi në facebook shkruan se qëllimi i tij ishte sensibilizimi:
“Sot u ndodha rastësisht pranë një djaloshi, diku tek 10 vjeç, që krahas çantës mbante në duar një qese të mbushur me dru, destinuar për klasën e tij. I bëra një foto në një kënd ku nuk identifikohej dhe e publikova në profilin tim në facebook, me motivin njerëzor që tenderi i cili duhej të bëhej që në verë për sigurimin e ngrohjes nëpër shkolla, të shpejtohet pasi temperaturat janë nën zero gradë”.
Por duket mesazhi i tij nuk është kuptuar, pasi ka edhe një sqarim për ndjekësit në rrjetet sociale:
“Përdora ironi në përshkrimin e situatës danteske, përshkrim që e bën hero djaloshin, prindërit e djaloshit dhe prindërit e mijëra nxënësve në Shqipëri të cilët edhe nën represionin e moratoriumit të pyjeve, nën çmimin e lartë të energjisë elektrike dhe të gazit, janë të detyruar të ngrohin shtëpitë e tyre si dhe klasat e shkollës, kjo e fundit detyrë e qeverisë!
Pastaj siç ndodh rëndom në këtë vend, portale të ndryshme dhe media online e publikojnë fotografinë bashkë me përshkrimin, jo vetëm për “like” por edhe për të sensibilizuar autoritetet që të marrin masat. Në këtë moment, unë në profilin tim dhe mediat në hapësirat e tyre e bëmë misionin që na takon, atë të informimit!
Pa ndonjë qejf të madh, duke qenë se në këto postime është etiketuar emri im, u futa dhe lexova disa komente. Ekzaktësisht gjysma e komentuesve e kishin kuptuar ironinë, ndërkohë gjysma tjetër kishin shpërthyer në sharje të kota, pa marrë mundimin të zbërthejnë ironinë. Dhe më lejoni të them me dhimbje se tragjikja në këtë mes nuk është djaloshi me dru, as klasat e ftohta, as Ministria e Arsimit, por kokat bosh të komentuesve që nuk kuptojnë minimumin e ironisë! Draaaamë!”
