Festimet në prag të ndërrimit të viteve e kanë kthyer Shkodrën në një prej destinacioneve më të preferuara për t’u vizituar nga turistët. Atmosfera e krijuar për festat e fundvitit, por dhe mikpritja e shkodranëve janë disa nga arsyet përse ky qytet vlerësohet shumë nga turistët vendas e të huaj.
“Emri im është Brian Fitzgerald dhe jam nga Happy Valley, Oregon, SHBA. Kam qenë në Shqipëri për më shumë se një muaj dhe kam udhëtuar kudo dhe Shkodra është qyteti im i preferuar deri tani, prandaj kam vendosur të transferohem këtu. Jam një veteran i ushtrisë dhe e adhuroj këtë qytet. Ky është panairi i Krishtlindjeve më i mrekullueshëm që kam parë ndonjëherë. Njerëzit janë të mrekullueshëm, janë të ngrohtë dhe të sjellshëm, dhe unë jam thjesht i bekuar që jam në këtë qytet dhe jam këtu në këtë ambient”.
Numrin e lartë të vizitorëve e konfirmon dhe Renato Lumci, drejtor i Turizmit në Bashkinë Shkodër, i cili thotë se nga informacionet e marra strukturat akomoduese dhe restorantet thuajse janë të rezervuara të gjitha.Ndriçimet festive, muzika dhe pjesëmarrja e artistëve të njohur në vend dhe aktivitetet e shumta e kanë shndërruar Shkodrën në një destinacion tërheqës për të gjithë grupmoshat. Stendat e ndryshme, shtëpizat festive, lojërat për fëmijë dhe programet kulturore kanë bërë që i gjithë muaji dhjetor të jetë festë për gjithë qytetin.
Tv Klan
