Pak orë pasi Sander Lleshi në cilësinë e zv/ministrit të Brendshëm ju la porosi të qarta drejtuesve të policisë së Shkodrës për goditjen e kriminalitetit dhe zbardhjen e ngjarjeve të rënda të shënuara në këtë qytet, plumbat i morën jetën një shtetasi dhe lanë të plagosur një tjetër mëngjesin e së mërkurës.
Kryeqendra e veriut u trondit në një nga zonat më të populluara, në hyrje të merkatës së Rusit kur breshëria e plumbave u shti në drejtim të 40 vjeçarit Fatos Ferracakut dhe Fatmir Mehaj.
Sipas raportimeve të dëshmitarëve në vendngjarje dhe policisë lokale, kanë qenë dy persona të maskuar që lëviznin me një motoçikletë që qëlluan në drejtim të 40 vjeçarit, ku plumbat më pas kapën edhe tregtarin e peshkut, pasi të dy po qëndronin me njëri tjetrin.
Plumbat e kapën në kokë, gjoks dhe këmbë 40 vjeçarin që rezultuan edhe fatal për të, pasi humbi jetën në spital, ndërsa shtetasi tjetër ndodhet jashtë rreziku për jetën, pasi plumbat e goditën në pjesën e legenit dhe kofshë. Autorët kanë shpejtuar të ikin nga vendi i ngjarjes dhe disa metra më tutje, në zonën e njohur si Livadhe kanë djegur motorin me të cilin lëviznin dhe janë larguar në drejtim të paditur.
Policia bëri shoqërimin në komisariat të disa tregtarëve që rezultojnë dëshmitarë okularë, ndërsa në ndihmë pritet ti vijnë edhe kamerat e sigurisë të subjekteve përreth.
Viktima rezulton kushëri i Arjan Ferracakut, i vrarë pak muaj më parë në zonën e Livadheve në Shkodër, ngjarje për të cilën policia nuk ka ende autor të dyshuar. Të paqarta mbeten shkaqet e kësaj ngjarje të radhës që trondit kryeqendrën e veriut, duke rënduar bilancin e vrasjeve dhe plagosjeve pa autor./oranews/
