Vetëm pak orë më parë Partia Demokratike nëpërmjet Enkelejd Alibeaj, kreut të Departamentit të Rendit dhe Sigurisë, akuzoi kryeministrin Edi Rama se ka emëruar në krye të Partisë Socialiste në Shkodër, një person të akuzuar për vrasje. Emri për të cilin foli Partia Demokratike është ai i Martin Cubit, ish-kryetar i Komunës Pult në Shkodër? Po për cilën vrasje të kryer nga Cubi, flet Partia Demokratike?
Sipas raportimeve të medias ngjarja ka ndodhur në 27 prill 2009. Opinion.al sjell të plotë edhe lajmin e ngjarjes së rëndë të ndodhur në Shkodër.
Sipas medias së kohës…
“Një person ka mbetur i vrarë me armë në Shkodër, ndërkohë që një tjetër shtetas është plagosur. Ngjarja ka ndodhur vetëm pak minuta më parë në Shkodër në lagjen “Skenderbeg”. Policia që bën me dije ngjarjen sapo ka mbërritur në vendin ku ka ndodhur krimi dhe po heton për zbardhjen e saj. Sipas të dhënave të para, mësohet se viktimë është shtetasi Dodë Hilli, 50-vjeç. “Ngjarja ka ndodhur në afërsi të spitalit të qytetit të Shkodrës”- thonë burimet e policisë, duke shtuar se i plagosur ka mbetur shtetasi Martin Cubi, kryetar i komunës Pult të këtij rrethi.
Sipas policisë, 50 vjeçari Dodë Hila u qëllua për vdekje me armë zjarri, ndërkohë që kryetari i komunës Pult, Martin Cubi, mbeti i plagosur me thikë.
Dyshohet se fillimisht viktima ka qëlluar me thikë kryetarin e komunës, i cili më pas i ka drejtuar armën.
Por, policia ende nuk ka dalë me një deklaratë zyrtare për ngjarjen. I plagosuri ndodhet në spital në gjendje të rëndë.
Dy familjet Hili dhe Cubi janë nga komuna e Pultit dhe janë të përfshira në disa ngjarje të rënda, por jo në ndonjë konflikt mes tyre. Familja Hili ka disa të vrarë dhe po kështu ka vrarë dhe një pjesë e saj ndodhet e ngujuar. Ndërsa familjes Cubi i është vrarë djali më 2006, Vuksan Cubi, vëllai i kryekomunarit, për gjakmarrje, pasi më 2003 ai kishte vrarë një tjetër person. Viktima Dodë Hili ka qenë i ndaluar nga policia më 22 nëntor 1998 me akuzën e presionit për të mos votuar që u bënte zgjedhëseve në referendumin për kushtetutën, në fshatin Kir të Dukagjinit. Më pas ai është arrestuar si i përfshirë në një ngjarje tjetër dhe kishte dalë nga burgu pak kohë më parë.”
Faksimile e shkrimit të kohës që raporton ngjarjen e rëndë
