Shkencëtarët kanë zbuluar këtë të mërkurë prova se valët gravitacionale në hapësirë të parashikuara nga Albert Ajnshtajn më shumë se një shekull më parë, po përshkojnë universin në frekuenca të ulëta, duke krijuar një zhurmë të sfondit kozmik.
Gjetjet e reja tregojnë se hapësira është e mbushur me këto valë gravitacionale, të cilat lëkunden me vite ose më gjatë dhe duket se e kanë origjinën kryesisht nga çiftet e 2 vrimave të zeza supermasive spirale që bashkohen së bashku, thotë Reuters.
Sipas astronomëve valët gravitacionale udhëtojnë me shpejtësinë e dritës dhe pa asnjë pengesë. Gjithashtu shenjë dalluese në rastin e valëve gravitacionale me frekuencë të ulët është lëvizja e tyre e vazhdueshme që krijon një zhurmë të mbytur në sfond të kozmosit.
Për të arritur në këtë konkluzion, të gjithë radioteleskopët e Tokës janë drejtuar për një vrojtim dhe regjistrim unik kundrejt 115 pulsar në galaktikën tonë Rruga e Qumështit.
“Valët gravitacionale krijohen nga objekte të dendura astronomike në universin tonë, zakonisht në orbitë rreth njëra-tjetrës. Ata në fakt shtrihen dhe ngjeshin vetë hapësirë-kohën ndërsa udhëtojnë nëpër univers,” tha astrofizikani i Universitetit Shtetëror të Oregonit, Jeff Hazboun.
Ajnshtajni në vitin 1916 propozoi ekzistencën e valëve gravitacionale si rezultat i teorisë së tij të përgjithshme novator të relativitetit, e cila e përshkruante gravitetin si shtrembërim të hapësirës dhe kohës nga materia.
Deri në zbulimin e tyre në vitin 2016, shkencëtarët kishin gjetur vetëm prova indirekte të ekzistencës së tyre, duke filluar nga vitet 1970./Opinion.al
