Rusia dhe Korea e Veriut javët e fundit kanë rritur tensionet në zonën detare. Mësohet se forcat ruse kanë ndalur tre anije koreano-veriore, si dhe 262 pjesëtarë të ekuipazheve, me akuzën e gjuajtjes ilegale.
Për të vërtetuar këtë, sasi të mëdha që tejkalojnë 30 mijë kallamarësh janë sekuestruar në anijet koreane, ashtu si dhe pajisje ilegale të gjuetisë së peshkut.
Kjo nuk është përplasja e parë mes Rusisë dhe Koresë së Veriut, javën e kaluar përballja midis forcave ruse dhe ekuipazheve koreano-veriore arriti deri në konflikt të armatosur, ku të paktën një koreano-verior ndërroi jetë dhe disa persona mbetën të lënduar.
Në lidhje me këtë ngjarje, Moska zyrtare u shpreh se marrëdhëniet mes dy palëve nuk do të kenë krisje. Korea e Veriut ka ngritur nivelin e agresivitetit në det, duke peshkuar edhe në ujëra që i përkasin vendeve fqinje, për të balancuar sadopak krizën ushqimore që e ka prekur vendin.
Gjatë bllokimit të anijeve nga forcat ruse, ekuipazhi koreano-verior u është përgjigjur duke qëlluar me armë në drejtim të tyre./ Opinion.al E.Xh.
