Shkëlzen Berisha, djali i ish-kryeministrit do të thirret për të dëshmuar në çështjen CEZ. Kërkesa e bërë nga të majtët ka acaruar demokratët. Deputeti i PS, Ervin Koçi, tha se duhej thërritur si dëshmitar djali i Sali Berishës, pasi emri i ka dalë në e-mailet e drejtuesve të CEZ, po ashtu dhe nga juristi i OSHEE-së, Romeo Karaj.
Por nënkryetari i komisionit, Arben Ristani, e ka quajtur si qesharake kërkesën e socialistëve, duke thënë se në e-mail nuk doli në asnjë moment emri i Shkëlzen Berishës, por vetëm flitej për dikë që cilësohej si “i biri”.
Arben Ristani akuzoi dje të majtët se po bëjnë shfaqje politike dhe se dëshmitari i tyre, që përfshin djalin e ish-Kryeministrit Sali Berisha, është fotografuar në shoqërinë e personit të dënuar nga gjykata si vrasës i Azem Hajdarit. Ristani ka nxjerrë fotot e Romeo Karait me Izet Haxhinë, duke thënë se dëshmitari kyç i socialistëve është bashkëpunëtor me një kriminel.
Por Taulant Balla tha se demokratët morën urdhër me SMS të largohen nga mbledhja, pas provave të tmerrshme që ka administruar Komisioni Hetimor.
“S’ka asnjë dyshim që këtyre u erdhën SMS nga Saliu dhe u larguan. Provat janë të tmerrshme. Kam dyshime se këta pas këtyre provave mund të largohen dhe nga Parlamenti, madje dhe bojkoti që po i bëjnë Reformës Zgjedhore është i lidhur me hetimet që po bën ky komision”, tha dje Balla.
