Policia e Tiranës njoftoi sot se ka gjobitur dhe u ka hequr patentat 40 qytetarëve të cilët protestuan mbrëmjen e djeshme pranë godinës së Teatrit Kombëtar. Mes tyre është edhe kryetari i Partisë Demokratike Lulzim Basha.
Sipas njoftimit të policisë, kreu demokrat ka shkelur Aktin Normativ Nr. 3, datë 15.03.2020 “Për marrjen e masave të veçanta administrative gjatë kohëzgjatjes së periudhës së infeksionit të shkaktuar nga COVID-19”.
Por kjo nuk është hera e parë që kreu i opozitës u gjobit ditën e djeshme. Më herë ai zhvilloi një takim në Kavajë me disa përfaqësues biznesesh. Policia konstatoi se ky takim ishte zhvilluar në ambjent të mbyllur dhe për pasojë gjobiti dhe i hoqi patentën Lulzim Bashës.
Protesta tek Teatri është shkelja e dytë që kreu i demokratëve ka kryer. Por çfarë parashikon Kodi Penal, i ndryshuar tashmë, për raste të tilla ?
“Moszabtimi dhe kryerja e veprimeve në kundërshtim me aktet ligjore apo nënligjore të nxjerra nga organet shetetërore, në funksion të gjendjes së epidemisë apo të zbatimit të masave të jashtëzakonshme, nga personi ndaj të cilit është dhënë më parë masë administrative, përbën kundravajtje penale dhe dënohet me gjobë ose me burgim deri në 6 muaj.” – thuhet në nenin 242/1 të Kodit Penal.
Bazuar në këto ndryshime të kodit penal dhe faktin që dy herë ndaj tij ka patur masë administrative, a rrezikon Basha dënimin me 6 muaj burg?/Opinion.al
