Policia greke shkatërroi një organizatë droge që trafikonte drogë nga Shqipëria në Greqi. Mes 44 të arrestuarve janë edhe 23 shqiptarë. Trafikantët shpërndanin drogë në Athinë dhe në ishullin Kos.
Shtatë drejtuesit e këtij rrjeti droge u arrestuan në Athinë. Hetimet zbuluan se organizata kriminale ishte e ndarë në 3 kategori hierarkike. Në krye të organizatës ishte një shtetas shqiptar, i cili drejtonte transportin e kanabisit dhe kokainës nga vendi ynë drejt Greqisë.
Droga magazinohej dhe ruhej në Athinë e më pas shpërndahej me sasi të vogla drejt ishullit Kos, që ndodhet pranë kufirit me Turqinë.
Prej fillimit të këtij viti, anëtarët e bandës kanë trafikuar mbi 200 kg kanabis sativa dhe 5 kg kokainë, duke përfituar mijëra Euro. Çmimi i shitjes së drogës varionte për zona të ndryshme. Në Athinë, 1 kg kanabis arrinte në 800 euro ndërsa 1 gr kokainë, 38 euro.
Çmimi ishte dyfish më i lartë për klientët në ishullin Kos.
Policia greke nuk ka bërë të ditur asnjë emër të anëtarëve të organizatës për shkak të hetimeve.
