Policia italiane ka shkatërruar dy organizata kriminale të drejtuara nga shqiptarë, që merreshin me trafikun ndërkombëtar të drogës, importimin e armëve dhe grabitje. Në pranga kanë përfunduar 22 shqiptarë. Baza e tyre ishte në Lazio, ndërsa operacioni është zhvilluar në disa qytete.
Gjatë hetimeve janë konfiskuar 350 kg marijuanë, 500 gram kokainë, dy armë. Njëqind policë kanë marrë pjesë në operacion. Grupet kriminale vepronin në rrethina, sidomos në zonat me dendësi më të lartë të shtetasve të huaj.
Operacioni i sotëm ishte koduar me emrin “Ça bon 2” dhe është vazhdim i operacionit të parë të koduar “Ça bon”, në janar 2014, ku u arrestuan pesë shtetas shqiptarë përgjegjës për importin e 800 kg marijuane të fshehur brenda një bllok gjigant prej shkëmbi.
Grupi i parë kriminal merrej me trafikun e drogës. Marijuana futej nga Shqipëria në sasi të mëdha dhe më pas në territorin italian vendosej në garazhe ose magazina. Çdo anëtar i organizatave kishte një rol të caktuar. Prej kohësh shqiptarët e arrestuar, identiteti i të cilëve nuk është bërë i ditur, mbaheshin në përgjim. Komunikimi i tyre ishte me kode, për shembull: “kova e bojës”, “makina”. Nëse lini një takim për të shkëmbyer drogën përdorej: je për një “kafe”.
Grupi tjetër merrej me grabitje dhe gjobëvënie. Nëse pronarët e banesave nuk iu jepnin atë që kërkonin shqiptarët ata dhunoheshin barbarisht.
