Denoncimi në emisionit “Stop” i ish-drejtorit të Fondit të Sigurimeve Shoqërore Tropojë, Ndriçim Hajdarmataj ka nxitur edhe persona të tjerë të shkarkuar nga puna ti drejtohen medias për të bërë publike rastet e tyre. I tillë është rasti i Vjollca Grudës, një punonjëse e shkollës së mesme profesionale “Beqir Çela” në Shkozet të Durrësit e cila shprehet se drejtori e hoqi nga puna për motive politike.
Vjollca Gruda, e diplomuar në degën Inxhinieri në vitet 1984-1989 ka punuar si përgjegjëse e bazës prodhuese të shkollës. Por, 10 ditë më parë ajo u hoq nga puna.
55-vjeçarja deklaroi se ajo është larguar nga drejtori i ri i shkollës, Fatmir Mërkuri, i cili erdhi në atë detyrë si koordinator i PS-së për zgjedhjet në Shkozetin në vitin 2015.
Në një intervistë për “Gazeta Shqiptare”, ajo tha se shkarkimi i saj ka prapavijë politike dhe se ka bërë padi në gjykatë, ku do të kërkojë drejtësi. Gruda tregoi me detaje përplasjet me drejtorin e shkollës, ndërsa bëri me dije se ai abuzon me detyrën.
“Eshtë absurd që pas 27 vitesh në profesion inxhiniere dhe 10 vite mësuese më heqin nga puna në këtë mënyrë. Gjithçka është e qartë, shkarkimi im ka prapavijë politike”, shprehet ajo.
Ajo thotë se shkarkimi ka prapavijë politike pasi ka hyrë në punë në kohën që në qeveri ka qenë e djathta. “Sa erdhi ky drejtor, shkolla u mbush me militantë partie që nuk kanë lidhje as me arsimin e as me zanatin. Unë kam pasur përplasje me drejtorin për shpërdorimet që ka bërë në shkollë”, tha me tej inxhinierja ne denoncimin per shkarkim të padrejtë.
