Fokusimi i investimeve publike në përmirësimin e infrastrukturës dhe imazhit në qendrat e qyteteve duket se ka kushtuar njësoj me ndërtimin e autostradës së re Tiranë -Elbasan.
Sipas të dhënave nga Ministria e Çështjeve Vendore gjatë viteve 2015-2016, janë investuar 39 miliardë lekë (285 milionë euro) në infrastrukturën vendore dhe rajonale, një pjesë e tyre nga Fondi i Zhvillimit të rajoneve.
Sipas të dhënave zyrtare këto fonde janë përdorur për investime në rrugë dhe rikonstruksione të autostradave, sisteme të ujësjellës dhe kanalizime, parqe publike dhe ndërhyrje të tjera.
Pjesë e këtyre investimeve kanë qenë projekti “Lungo mare” në Vlorë. Disa nga objektet e financuara janë: Hyrjet e Tiranës nga Durrësi dhe Elbasani, Sistemimi i 2 shesheve në Tiranë, Unaza e Divjakës, Rruga Transballkanike në Vlorë, mbushja me rërë e plazhit Vlorë, rruga e Dajtit, Sheshi i Kukësit, Shëtitorja Himarë, etj; Punimet kanë përfunduar në 37 objekte dhe në fazën e zbatimit janë 2 objekte. Punimet në të gjitha objektet parashikohen të përfundojnë në Maj 2017.
Janë ndërtuar Ujësjellësit në Sarandë, Dhërmi, Ksamil. Punimet kanë përfunduar në të gjitha skemat e ujësjellësve dhe u janë dorëzuar bashkive përfituese.
Disa nga projektet mjedisore kanë të bëjnë me pyllëzimi i Krastës në Krujë, Gjelbërimi i aksit rrugor Plepa – Vlorë, Gjelbërimi i vijës bregdetare të Vlorës dhe Parkut të Liqenit Artificial në Tiranë; Gjelbërimi i aksit Levan – Kakavijë, Lushnje – Berat, Gjelbërimi i aksit IKV- Surrel, dhe Segmentit Lin – Pogradec, etj..
Punimet e mbjelljes së pemëve kanë përfunduar në 8 objekte, nga të cilat 2 janë mbyllur përfundimisht dhe 6 te tjera janë në periudhë mirëmbajtje. Në dy objekte të tjera punimet janë në proces dhe pritet të mbyllen gjatë vitit 2017.
Në sektorin e arsimit janë financuar invetsimet në shkollën e mesme Tunjë, Gramsh; Shkolla 9 vjeçare në fshatin Sheq të Frakullës, Shkolla 9 vjeçare në Toshkëz, Njësia AdmnistrativeAllkaj; Shkolla 9-vjeçare Dërsnik, Njësia AdmnistrativeVoskop. Punimet kanë përfunduar në të gjitha shkollat. Objektet ndodhen në periudhën e garancisë së defekteve dhe pritet t’i dorëzohen bashkive përfituese gjatë vitit 2017./Monitor
