Ukraina ka akuzuar Rusinë se ka sulmuar qytetin e Bakhmutit me bomba me fosfor. Duke publikuar pamje të filmuara me dron, Kievi zyrtar thotë se qyteti i rrethuar u mbulua me një “shi” bombash.
Armët me fosfor të bardhë nuk janë të ndaluara, por përdorimi i tyre në zona civile konsiderohet si krim lufte. Ato krijojnë zjarre që përhapen me shpejtësi dhe janë shumë të vështirë të shuhen. Rusia është akuzuar edhe më parë se ka përdorur bomba të tilla.
Trupat ruse po përpiqen prej disa muajsh tashmë të marrin në kontroll Bakhmutin, pavarësisht pikëpyetjeve për vlerën strategjike të tij. Sipas zyrtarëve të shteteve perëndimore, mijëra ushtarë rusë kanë humbur jetën në këtë përpjekje.
Në një postim në Twitter, Ministria ukrainase e Mbrojtjes tha se sulmi me fosfor ishte kryer në zona të papushtuara në Bakhmut, për të shkaktuar zjarre. Sipas forcave speciale ukrainase, synimi i ushtrisë ruse është shkatërrimi i qytetit.
Autoritetet vendase nuk dhanë sqarime se kur ndodhi sulmi, por vetëm publikuan pamjet. Rusia është akuzuar se ka përdorur bomba me fosfor edhe në Mariupol dhe qytete të tjera përgjatë 15 muajve të luftës. Moska nuk i ka pranuar kurrë këto akuza.
Fosfori i bardhë është një substancë e ngjashme me dyllin, që merr flakë sapo bie në kontakt me oksigjenin, duke shkaktuar zjarr dhe tym. Zjarri i krijuar arrin temperaturë deri në 800 gradë celsius dhe mund të shkaktojë dëme të rënda te njeriu.
Sipas Human Rights Watch, lënda kimike është përdorur vazhdimisht në 15 vitet e fundit, përfshirë edhe nga forcat amerikane në Siri dhe Irak, gjatë luftimeve kundër ISIS. Edhe pse nuk futet tek armët e ndaluara nga ligjet ndërkombëtare, disa mendojnë se përdorimi pranë zonave të populluara me civilë është i ndaluar.
Bakhmuti ishte një qytet me 80 mijë banorë, të cilët sot janë larguar thuajse të gjithë prej aty. Në qytet raportohet se kanë luftuar trupat mercenare të Wagner, por shefi i tyre, Yevgeny Prigozhin, deklaroi të premten se më 10 maj do të tërhiqet, për shkak të mungesës së armatimit.
