Përplasje fizike mes volejbollisteve që mund të kishte edhe ndonjë fund më të hidhur, nëse nuk do të ishin prezente forcat e rendit në sallën sportive “Farie Hoti”.
Ndeshja ka qenë e vlefshme për kampionatin kombëtar për të reja e fituar me rezultatin e pastër 30 nga bardheblutë, por që fundi i saj la një shije të hidhur.
Në një prononcim për “Panorama Sport”, trajneri i të kuqve, Ilir Thanasi, jep detaje për sherrin e ndodhur.
“Ndeshja mbaroi qetësisht dhe në fund fitoi ajo skuadër që luajti më mirë. Pra, fitoi Tirana me rezultatin 30.
Në momentin që vajzat e skuadrës sime afrohen te stoli për të marrë çantat e materialet, shoh një moment Stela Agollin mes lojtareve të mia duke sharë, bërtitur e ulëritur.
Një bisedë si të moshës së tyre. Në moment shkoj unë së bashku me të dy arbitrat. Shpreh keqardhjen se po përdorte një fjalor aspak etik, ndërkohë shkon dhe më tej e gjuan me shpullë lojtaren tonë Livian (Xhaferraj). U ndodh edhe policia në çast dhe i mori me vete për sqarim.
Vetë Livia zgjodhi të mos bëjë denoncim. Për rastin në fjalë, ne si klub kemi njoftuar edhe Federatën Shqiptare të Volejbollit.
Madje, si presidenti dhe sekretari ishin të pranishëm në pallatin e sportit. Deri në momentin që ata ishin prezentë, gjithçka shkoi shumë mirë dhe pasi u larguan, filloi një acarim mes lojtareve në kuptimin e vonesës së lojës.
Gjithçka ndodhi aty për aty dhe nuk di të them se si kanë qenë problemet më parë.
E përsëris që në fushë nuk pati asnjë përplasje.
Livia nga ana e saj i kërkoi sqarime se kë shan ti dhe çdo gjë ndodhi mes tyre”, sqaroi fillimisht për gazetën trajneri i Partizanit, Thanasi.
Në vijim kreu i pankinës së kuqe shprehu keqardhjen dhe për indiferencën e shfaqur nga stafi teknik i bardhebluve.
“Ai mund të jetë ekip shumë i bukur, por kur nuk ka një drejtues, kjo lë për të dëshiruar. Kur ndodhi incidenti, ishim prezentë unë dhe dy gjyqtarët, ndërkohë që nuk e mora vesh ku ishte trajnerja e skuadrës tjetër. Realisht e pa incidentin. Dhe sinqerisht më vjen shumë keq që si ka mundësi kolegia ime nuk vjen për të ulur tensionin.
Pas ndeshjes, edhe gjyqtarët e takimit, sipas rregullores, mbajtën raportin e tyre.
Gjithashtu edhe ne si klub do të marrim masat tona, duke i bërë një relacion federatës për incidentin e ndodhur me Tiranën”, e mbylli prononcimin e tij trajneri Thanasi.
Gazeta tentoi të kontaktonte edhe me trajneren e Tiranës, Rudina Omari, por nuk mundi të merrte një reagim prej saj.
