Ndeshja Shqipëri-Zvicër nuk ka kaluar pa incidente edhe jashtë fushës së blertë. Arjan Alico u arrestua gjatë së dielës nga policia e Lushnjes, pasi qëlloi 10 herë me thikë një 36-vjeçar nga Karbunara e Madhe.
Alico, i cili ka qenë i dyshuar si anëtar i bandës së Aldo Bares dhe i dënuar më parë për vrasje, në bashkëpunim me të birin e tij kanë qëlluar 36-vjeçarin Julian Sula pas debateve që patën për ndeshjen Shqipëri-Zvicër, që u luajt të shtunën në Francë ku mbahet kampionati europian.
Sherri mes tyre ka ndodhur në një lokal bastesh në Lushnje, ku ata nuk kanë pasur dakordësi sa i përket debutimit në fushë të lojtarëve. Dëshmitarët thanë se gjithçka nisi për shkak të interpretimeve të tyre për lojën, futbollistët dhe gabimet që na penalizuan
Policia ka shpallur në kërkim djalin 24-vjeçar të Alicos. Ndaj tyre rëndon akuza e “tentativës së vrasjes” dhe “plagosjes së rëndë me dashje”, kryer në bashkëpunim, shkruan Panorama. Edhe djali i tij rezulton i dënuar më parë për “vrasje të mbetur në tentativë”.
I plagosuri ndodhet nën kujdesin e mjekëve në gjendje të rëndë në Spitalin e Traumës në Tiranë dhe mësohet se është në gjendje kritike për jetën. Kjo, pasi sipas mjekëve mjeti prerës i ka prekur disa nga organet jetësore, çka i ka shkaktuar edhe hemorragji edhe plagë të rënda.
