Pronari i lokalit që plagosi me armë zjarri qiraxhiun ka deklaruar sot para gjykatës së gjithçka e ka bërë për vetëmbrojtje, pasi ai mund ta qëllonte dhe ta vriste.
Gjykata e Shkodrës vendosi masën e arrestit me burg për Dedë Gurin, qqë plagosi qiraxhiun se nuk kishte paguar faturën e dritave të lokalit.
Guri pranoi krimin para gjykatës dhe u shpreh se e qëlloi me armë, pasi Fatmir Zyla mund ta vriste pas sherrit për faturën e dritave që nuk kishte paguar.
Sherri për faturën e dritave të lokalit
Ngjarja e rëndë ka ndodhur mbrëmjen e së mërkurës në qytetin e Shkodrës në unazën lindore pranë Stacionit të Trenit në rrugën “Pal Engjelli”.
Ka qenë një debat në mes pronarit Dedë Guri 60 vjeç dhe qiraxhiut Fatmir Zyles 33-vjeç për të paguar faturën e energjisë elektrike të lokalit.
Zyla i ka thënë se nuk do e paguaj faturën e energjisë dhe në këtë moment kanë nisur të debatojnë. 60-vjeçari është larguar në banesë për të marrë armën e për t’u rikthyer pas disa minutash.
Në këtë moment 60-vjeçari ka qëlluar me kallashnikov pa paralajmërim dy herë duke plagosur rëndë 33-vjeçarin.
Pasi kanë dëgjuar të shtënat, vjehrra e Zyles ka dalë në rrugë ndërsa ka tentuar të qëlloj mbi autorin Dedë Guri por i është bllokuar pistoleta.
