Dy zyrtarë të klubit të futbollit të Kastriotit, Presidenti dhe Drejtori Teknik janë arrestuar pas sherrit që ndodhi gjatë sfidës me Tiranën që u luajt të shtunën në stadiumin “Selman Stërmasi”.
Sipas policisë dy zyrtarët akuzohen për veprat penale “Kundërshtim i punonjësit të policisë së rendit publik” e kryer në bashkëpunim, dhe “Veprime të dhunshme në aktivitete sportive” të kryera në bashkëpunim.
“Specialistët për Hetimin e Krimit në Komisariatin e Policisë Nr.2 bënë arrestimin në flagrancë për veprat penale “Kundërshtim i punonjësit të policisë së rendit publik” e kryer në bashkëpunim, dhe “Veprime të dhunshme në aktivitete sportive” të kryera në bashkëpunim, të shtetasve :
- A.V., 34 vjeç, Presidenti i një ekipi futbolli ;
- G.V., 32 vjeç, Drejtor Teknik i një ekipi futbolli”,thuhet në njoftimin e policisë.
Arrestimi i tyre u bë pasi gjatë zhvillimit të ndeshjes Tirana-Kastrioti në bashkëpunim me njëri tjetrin, kanë hyrë në fushën e lojës duke shkaktuar tension dhe ndërprerjen e ndeshjes për disa minuta dhe më pas kanë goditur dy punonjës policie për të shmangur shoqërimin e tyre.
Materialet i kaluan Prokurorisë pranë Gjykatës së Shkallës së Parë Tiranë, për veprime të mëtejshme./Opinion.al
