Konflikti që ndodhi mbrëmjen e së dielës në rrugën “Bardhyl”, që u shoqërua edhe me të shtëna me armë në ajër, dyshohet të ketë ndodhur për prishjen e pazareve në shitjen e një makine.
Policia e Tiranës ka ndaluar dy shtetasit që u përfshinë në këtë konflikt, Luan Livadhin, 47 vjeç dhe Gentian Kaun, 33 vjeç, për të cilët u vendos që të hetohen në gjendje të lirë.
Ndërsa është identifikuar dhe shpallur në kërkim shtetasi me iniciale L.Q., i cili rezultoi të ketë shkrepur dy herë në ajër një pistoletë, që dyshohet të jetë “TT”, e kalibrit 7.62 milimetra.
Ngjarja ndodhi rreth orës 16:20 të mbrëmjes së të dielës në rrugën “Bardhyl”, disa metra larg një karburanti, në krahun përballë tij, ku ndodhen qepenat që rrethojnë Qendrën Spitalore “Nënë Tereza”.
Dëshmitarë të shumtë që panë konfliktin lajmëruan në sallën operative për të shtëna me armë dhe në vendngjarje shkuan menjëherë shërbimet e Komisariatit nr.4 dhe Njësia “Shqiponjat”. Dy prej të dyshuarve, që u përfshinë në konflikt, u ndaluan teksa po udhëtonin me automjete të ndryshme në drejtim të Dajtit. Nga hetimet rezultoi se shtetasi Luan Livadhi kishte shkuar të takohej me Gentian Kaun, pasi kishte rënë dakord me këtë të fundit për shitjen e një makine.
Teksa po bisedonin rreth çmimit të automjetit, Livadhi është nxehur, duke qenë se nuk ishte ajo shuma për të cilën kishte rënë dakord dhe për këtë arsye, mes tyre fillimisht ka pasur një përplasje fizike. Ndërsa me ta kanë qenë edhe persona të tjerë, që ende nuk janë identifikuar nga policia. Shtetasi që ka qëlluar me armë ndodhej në krahun tjetër të rrugës, përballë tyre, dhe kur ata kanë nisur të godasin njëritjetrin, ai ka shkrepur dy herë pistoletën. /panorama/
