Oltian Cepa, shqiptari i akuzuar për vrasjen e mbetur në tentativë të një 23-vjeçari rumun Giordano Bogdan, më 7 shkurt 2016 në Altopascio të Italisë është dënuar me katër vite e gjashtë muaj burgim. Ai u përfshi në një sherr masiv mes shqiptarësh dhe rumunësh.
Hetuesit zbuluan se mosmarrëveshja midis shqiptarit dhe rumunit filloi gjatë një komunikimi në WhatsApp. Cepa kishte shkruar fyerje kundër një vajze në grupin e tyre të përbashkët dhe për këtë ai ishte përjashtuar nga administratori i grupit, i cili ishte Giordano Bogdan.
Ky veprim shkaktoi pakënaqësi tek shqiptari i cili e kërcënoi në mesazhe dhe më pas e ftoi të ballafaqoheshin.
Të rinjtë u takuan në orën 18.30 të 7 shkurtit, në qendër të Altopascio, ku Cepa, me vëllanë e tij dhe pesë të rinj të tjerë, shkuan në takim të pajisur me kaçavida dhe thika.
Pasi identifikuan rumunin, i cili shoqërohej nga babai dhe kushëri i tij, ata i sulmuan brutalisht. Të tre rumunët u plagosën, por në gjendje më të rëndë ishte 23-vjeçari, i cili u qëllua në ballë me kaçavidë.
Në qershor të vitit 2016, vëllezërit Cepa u arrestuan, ndërsa të dyshuarit e tjerë, duke përfshirë një të mitur, u lanë të lirë./Opinion.al
