Komisioni i Pavarur i Kualifikimit pritet të konfirmojë në detyrë gjyqtarin e Apelit të Tiranës, Ilir Toska. Kjo u vu re sot gjatë seancës dëgjimore me gjyqtarin. Toska rezultoi pa probleme me pasurinë e tij dhe kriterin e aftësive profesionale.
Ndërkohë KPK rrëzoi një raport të DSIK-së (Drejtoria e Sigurimit të Informacionit të Klasifikuar, pranë Kryeministrisë) që konsideroi gjyqtarin “të papërshtatshëm” sa i përket kriterit të pastërtisë së figurës.
Valbona Sanxhaktari e vuri në pikëpyetje raportin e DSIK-së duke thënë se “raporti iu nënshtrua hetimit të thellë nga ana e trupës gjyqësore, me qëllim gjetjen e provave për marrjen e një vendimi sa më të drejtë në lidhje me subjektin e rivlerësimit. Në përfundim të këtij procesi ka rezultuar se informacionet e ardhura nga institucionet e sigurisë, mbi të cilat është mbështetur raporti i DISK-së nuk janë të mbështetura në fakte dhe prova”.
Hetimi administrativ për gjyqtarin Toska përfshiu të tria kriteret e rivlerësimit.
Sipas relatores Valbona Sanxhaktari, gjyqtari i Apelit të Tiranës zotëronte një apartament me sipërfaqe 83 m2 në lagjen “Ali Demi” në Tiranë, i blerë për 50 292 euro në vitin 2005. Përveç raportit pozitiv nga Inspektoriati i Lartë i Deklarimit dhe Kontrollit të Pasurive, ILDKPKI, trupa gjyqësore ka kryer hetime të pavarura administrative në fund të së cilave ka rezultuar se gjyqtari nuk kishte pasuri të fshehura.
I pranishëm në seancën dëgjimore, Ilir Toska deklaroi se nuk ka asnjë kundërshtim ndaj gjetjeve të Komisionit të Pavarur të Kualifikimit dhe se e konsideronte procesin korrekt.
“Procesin e konsideroj të rregullt, ligjor dhe të paanshëm dhe gjetjet trupës gjyqësore janë tërësisht korrekte. Kërkoj konfirmimin në detyrë,” tha gjyqtari në fund të seancës dëgjimore që zgjati rreth 20 minuta. Vendimi për gjyqtarin Ilir Toska do të merret të enjten.
