Nga Dritan Laci
Zgjedhjet e fundit në Kryesinë e Partisë Socialiste treguan edhe njëherë krisjen e madhe brenda kësaj force politike, e cila duket se po shkon drejt legalizimit të një tjetër fraksioni, ku e vetmja dilemë e mbetur është nëse do të kemi një grupim që do të vazhdojë të luftojë brenda partisë apo do të kemi një grupim të pakënaqurish që do të zgjedhë ta luftojë partinë mëmë nga jashtë, me lindjen e një partie bijë.
Në fakt në 25 vite të ekzistencës së saj me emrin Partia Socialiste, nuk është hera e parë që kjo parti pëson një hemoragji të tillë brendshme .
Po aq sa është e vërtetë që shumë pak prej kryeneçëve që kanë braktisur partinë mëmë, ja kanë dalë të mbijetojnë me partitë e tyre të reja.
Rasti më i suksesshëm mund të quhet ai i Ilir Metës, i cili pas KPD-së së famshme të vitit 2002, dy vite më pas krijoi partinë e tij të quajtur Lëvizja Socialiste për Integrim. I vetmi që me partinë e tij mundi të kushtëzonte Partinë mëmë, duke i krijuar me votat e mbledhura bllokadë në ngjitjen në pushtet (kujtoj vitin 2009), por edhe të rimerrte pushtetin në vitin 2013.
Të gjithë të tjerët që kanë provuar të ndjekin shembullin e Metës, kanë qenë thjesht dështim spektakolar. Aq evidente sa të gjendur përballë nevojës politike për mbijetesë, i janë qepur si shtojcë partisë mëmë, duke gëlltitur edhe parimet për të cilat luftuan dhe u ndanë.
Sot jemi në një rast po kaq të ngjashëm. Ben Blushi një tjetër eksponent i rëndësishëm i Partisë Socialiste, një nga zërat më kritik të qeverisjes Rama-Meta, ashtu sikur pritej është lënë jashtë kryesisë së re të Partisë Socialiste.
Sigurisht që ky ekzekutim politik në kupolën e PS-së nuk mund të bëhej pa një orientim të qartë nga maja e piramidës.
Sot ashtu siç edhe kishte paralajmëruar, Blushi ka ndërrmarrë një tur të gjatë në bazë. Një tur i cili thuhet se ka për qëllim parashtrimin e një platforme politike, kundër Rilindjes kanabiste, siç thotë Blushi. Por edhe një formë presioni ndaj Ramës, që edhe pse e la jashtë kryesisë së re të Partisë Socialiste, do ta ketë të vështirë të mbajë në kontroll Blushin dhe të tijët, të cilët janë kthyer në një shqetësim real, kur kanë mbetur edhe diçka më shumë se një vit nga zgjedhjet parlamentare.
Ajo që duhet parë është nëse Blushi do të vazhdojë të flasë brenda Partisë Socialiste, apo do të kemi një tjetër Parti bijë. Dhe nëse do të formojë një parti të re, sa i aftë do të jetë ti imponohet Ramës në etjen e tij për pushtet? Dhe cili do të jetë qëllimi i Blushit, një parti e re politike apo një frymë e re politike?
