Që në orët e para të mëngjesit, në zonën pranë shkollës “Petro Nini Luarasi” ka pasur përplasje mes banorëve dhe policisë, për shkak se dy banesa ngjitur me njëra-tjetrën do të shemben. Pretendohet se toka me vendim gjykatë u është dhënë një pale tjetër.
Banorët kundërshtuan vendimin dhe në shenjë proteste u shtrinë në rrugë, ndërsa njëra prej tyre humbi edhe ndjenjat. Mes banorëve që u kërkohet të dalin nga shtëpia, është edhe një efektive policie e cila për ironi të fatit sot është përplasur me kolegët e saj. Ajo ka treguar se biznesmeni që do të ndërtojë pallatin aty, nuk zbaton kontratën për t’i dhënë çfarë u takon pasi me arrogancë thotë se aty jetojnë njerëz të rëndësishëm dhe jo njerëz të thjeshtë.
“Më datë 27 erdhi Jona Shaba, pretenduese se ka blerë shtëpinë e kërkonte të hynte me dhunë në banesë. Si pasojë nusja e vëllait u sëmur, shkova të bëj kallëzim në komisariatin numër 2. Tomor Merdini nuk e merrte dot kallëzimin se nuk dinte çfarë neni t’i vinte, talleshin me ne. ‘Kanosje dhe dhunë në banesë’, do të ishte neni o Tomor Merdini. Le të më heqin nga puna, unë pronën time do ta mbroj. Jam një qytetare e thjeshtë. Jam në proces gjyqësor ende, sepse Altin Shkurti e ka blerë këtë vendim gjyqësor. Në vendin tonë çdo gjë është e korruptuar. Ky është realiteti në Shqipërinë tonë, po na persekutojnë për së gjalli. Ky është një vend i lakmueshëm për ndërtuesit, por duhet të zbatojë vetëm kontratën. Ato metra ai nuk do na i japin sepse këtu thotë do vijnë persona VIP, ne jemi një popull i thjeshtë. Të gjithë anëtarët e familjes mbahen me rrogën time. Shteti le t’i japë zgjidhje. Aleksandër Gavoci nuk është burrë, nuk është biznesmen i ndershëm. I ka korruptuar të gjithë me gjyqtarë e prokurorë”, ka thënë policja me lot ndër sy./Opinion.al
Lexo edhe: Tiranë/ Duan t’i prishin shtëpinë, banorët shtrihen në rrugë
