Kryetari i Lëvizjes për Zhvillim Kombëtar, Dashamir Shehi shprehet se Berisha po i bën presion Partisë Demokratike për të bojkotuar Kuvendin.
Në një intervistë për “Shekulli” ai thotë se kjo sjellje është njësoj si vetizolimi për PD-në.
“Presioni po ushtrohet nga Berisha dhe të tjerë, pasi sipas tyre kjo është rruga më e mirë për të fituar pikë. Por sipas meje, kjo jo vetëm që nuk është rruga për të fituar pikë, por është një lloj vetizolimi dhe vetizolimi nuk është produktiv për opozitën në asnjë rrethanë. Unë këtë sjellje të opozitës e quaj një ekspozim të kotë dhe të panevojshëm, si para ndërkombëtarëve dhe para qytetarëve shqiptarëve.
Sipas meje, PD-ja nuk është duke përdorur armët e duhura në këtë betejë. Ne i kemi të gjitha mundësitë për t’i mbrojtur qëndrimet tona në Parlament. Nuk e di ku është leverdia për të dalë jashtë Parlamentit? Përgjigjen e kësaj pyetje nuk e kam kuptuar ndonjëherë”, shprehet Shehi.
