Ish deputeti i Partisë Demokratike, Agron Shehaj ka denoncuar sot se kontrata konçensionare për rrugën Milot – Balldren është mashtruese dhe skemë korruptive.
Shehaj e argumenton denoncimin e tij duke në bazë të veprimeve financiare të kompanisë fituese ANK. Sipas tij kapitali prej 4 milion eurosh i kompanisë nuk mund të justifikojë investimin 52 milion euro që do të bëjë për rrugën por as edhe marrjen e kredisë prej 70 milion eurosh.
“Kontrata e koncensionit të rrugës Milot-Balldren është kontratë mashtruese. Kompania ANK ka marrë përsipër të paguajë 52 milionë euro nga kapitali i saj, kur ka vetëm 4 milionë euro kapital. Kompania ka premtuar që me ketë kapital minimal do të marrë edhe 70 milionë euro të tjera kredi nga bankat dhe 19,5 milionë euro financim nga furnitorët (!).
Ose ANK ka fryrë kostot në një skemë tipike korrupsioni, ose do pastrojë para të pista në këtë projekt, ose të dyja bashkë. Një gjë është e sigurt: kompania nuk e ka kapitalin për të cilin ka mashtruar në kontratë dhe ky mashtrim duhet hetuar menjëherë”, ka shkruar Shehaj në Facebook.
Projekti i rrugës Milot – Balldren parashikon ndërtimin e një aksi tërësisht të ri që është pjesë e korridorit Adriatiko-Jonian dhe do të kushtojë 161 milion euro për 17.2 kilometra që përllogaritet rreth 15 milion euro për çdo kilometër bashkë me taksat.
Kujtojmë se ish deputeti Shehaj ishte i pari që denoncoi kontratën konçesionare për ndërtimin e Unazës së Re e cila rezultoi mashtruese dhe u anulua. /Opinion.al
