Shefi i CIA-s William Burns, ndodhet në Kosovë në një vizitë të paparalajmëruar. Sipas mediave në Kosovë Burns, ndodhet në ndërtesën e Presidencës së Kosovës.
Gjithashtu në oborrin e presidencës janë parë edhe forca të shtuara policore si dhe rrugët janë bllokuar.
Theksohet se kreu i CIA-s vizitoi Sarajevën ku u takua me komunitetin e inteligjencës dhe krerët e vendit, më pas, sipas mediave serbe, qëndroi në Beograd, nga ku nuk doli as edhe një foto e vetme nga takimet e tij.
Vizita në Prishtinë e kreut të CIA-s është e paprecedentë dhe tregon shqetësimin serioz të Shteteve të Bashkuara për situatën e sigurisë në vend, por jo vetëm.
Vizita bëhet në një kohë kur Shtetet e Bashkuara po shprehin hapur shqetësimin lidhur me marrëdhëniet sfiduese me Prishtinën zyrtare dhe ndërkohë që Departamenti i Shtetit konfirmoi se Albin Kurti nuk do të ketë takime dypalëshe në Washington.
Tensionet më të fundit midis Prishtinës dhe aleatëve perëndimorë, lidhen me përpjekjet unilaterale të Kurtit për të hapur për qarkullim për automjete Urën mbi Lumin Ibër, gjë që kundërshtohet hapur nga aleatët për shkak të shqetësimeve të përshkallëzimit të situatës së sigurisë në vend dhe në rajon.
