Në një takim në Ministrinë e Brendshme, e ngarkuara me punë në Shqipëri Leyla Moses-Ones ka theksuar se reforma në drejtësi po ecën përpara me raste konkrete dhe të prekshme të ndjekjeve penale. Moses-Ones tha se SHBA mbështet të gjitha institucionet në Shqipëri, si ato ekzistuese ashtu edhe institucionet e reja të drejtësisë.
“SHBA mbështetin institucionet e reja të Shqipërisë, si këshillat, SPAK, institucionet eksiztuese që janë të gatshme të luftojnë kundër krimit të organizuar. Po sjellin ndjekje penale të dukshme dhe ne presim më shumë. Shkurt dhe prerë, reforma për drejtësi po ecën para dhe nuk do të ndalet”, tha e ngarkuara me Punë Leyla Moses-Ones.
Duke folur për policinë shqiptare, përfaqësuesja e ambasadës amerikane u shpreh se SHBA do të ndihmojë në modernizimin e mëtejshëm të uniformave blu. Ndërkohë, Ministri Sandër Lleshaj tha se prokuroria dhe policia janë të ndryshme, duke ia bërë shpesh njëra-tjetrës me gisht duke shmangur përgjegjësitë.
“Jo rrallë ndodh që Policia ka pamje tjetër, Prokuroria tjetër, të cilat jo domosdoshmërish janë të njëjta. Sistemi tashmë e mundëson që të jenë shumë të vështira alibitë institucionale, sepse tentojë t’ia bëjnë njëra tjetrës me gisht. Jam optimist se hapat e mëtejshëm midis policisë dhe Prokurorisë do kenë protokolle të qarta për menaxhimin e përbashkët të këtij sistemi për të arritur atë objektiv të përgjithshëm që të gjithë qytetarët presin më shumë rend”, u shpreh Lleshaj./Opinion.al
