Shtetet e Bashkuara të Amerikës kanë shfaqur gatishmëri për të vendour sanksione shtesë kundër institucioneve financiare që ndihmojnë Nicolas Maduro për situalën aktuale në Venezuelë, tha i dërguari i posaçëm i SHBA-ve, Elliott Abrams.
Edhe pse nuk dha detaje mbi masat e reja, Abrams kujtoi se Departamenti i Thesarit i SHBA-ve vendosi sanksione mbi bankën ruse Evrofinance Mosnarbank, pasi e akuzoi se po ndihmonte kompaninë shtetërore të naftës në Venezuelë, PDVSA, për të shmangur kufizimet financiare të aplikuara nga SHBA.
Abrams tha gjithashtu se Uashingtoni është në bisedime me vendet e tjera rreth sigurisë në Venezuelë, pasi vendosi të tërheqë diplomatët e mbetur atje. Ai tha se Shtetet e Bashkuara nuk besojnë se qeveria e Maduro mund të mbrojë ambasadën amerikane.
Uashingtoni ka njohur kreun e opozitës Juan Guaido si presidenti i ligjshëm i Venezuelës. Gjithashtu rreth 50 vende në Evropë dhe në Amerikën Latine kanë ndjekur Shtetet e Bashkuara të Amerikës, duke njohur Guaidon si president të Venezuelës, ndërsa disa u janë bashkuar edhe sanksioneve amerikane. Ndërkohë qe Maduro mbështetet fuqishëm nga Rusia, Kuba dhe Kina.
Maduro drejton vendin prej vitit 2013, dhe fitoi një tjetër mandat presidencial në maj të vitit 2018. Zgjedhjet u bojkotuan nga opozita dhe u kritikuan ashpër nga faktori ndërkombëtar. Ai është përballur gjithashtu me akuza për abuzime me të drejta të njeriut si dhe për keqmenaxhim të ekonomisë së Venezuelës./Opinion.al
