Gjenerali amerikan, Robert P. Ashley, deklaroi se agjencitë amerikane të Inteligjencës besojnë se Rusia mund të jetë duke kryer testime bërthamore të nivelit të ulët, të cilat mund të jenë në kundërshtim me një traktat të firmosur mes dy vendeve.
“Ata nuk kanë përmendur nivelin zero të testimeve. Ne besojmë se ata kanë aftësi për ta bërë këtë”, ka thënë Ashley kur e pyetën nëse agjencitë amerikane kanë vërtetuar se Rusia është duke i kryer këto testime në kundërshtim me traktatin.
Nga ana tjetër zyrtarët rusë ende nuk kanë komentuar mbi këto pretendime, për të cilat është raportuar fillimisht në gazetën Wall Street Journal.
Traktati Gjithpërfshirës për Ndalimin e Testimeve Bërthamore ndalon të gjitha shpërthimet bërthamore, si ushtarake, ashtu edhe ato civile, pavarësisht situatës. Ky traktat është nënshkruar nga Rusia dhe Shtetet e Bashkuara.
Më herët gjatë vitit, administrata e presidentit amerikan, Donald Trump ka njoftuar se do të tërhiqet nga Traktati i vitit 1987 për Kontrollin e Armëve, i cili parasheh eliminimin e një vargu raketash./Opinion.al
