Të paktën 20 persona kanë vdekur nga përmbytjet dhe dëmtimet e tornados që përfshiu shumë shtete në pjesën perëndimore dhe jugore të SHBA gjatë fundjavës.
Sipas mediave të huaja, gjysma e vdekjeve të raportuara, të cilat përfshinin fëmijë dhe të moshuar, ishin në Tenesi dhe tre ishin në Misuri. Dy persona kanë vdekur në Kentaki, ndërsa Indiana, Misisipi, Xhorxhia dhe Arkansas kanë raportuar gjithashtu vdekje nga stuhia.
Moti i ashpër ka bërë që lumenjtë të fryhen edhe të dielën. Shërbimi Kombëtar i Motit paralajmëroi se dhjetëra vende do të arrijnë “fazën e përmbytjeve të mëdha” edhe pse shiu ngadalësohet.
Stuhia pritet të lëvizë drejt bregut juglindor të Atlantikut të hënën.
Në Kentaki, një djalë 9-vjeçar u përfshi nga përmbytjet teksa po shkonte drejt stacionit të autobusit të shkollës. Trupi i tij u gjet dy orë më vonë.
Në Misuri, zjarrfikësi vullnetar 16-vjeçar Chevy Gall vdiq në një aksident ndërsa përpiqej të shpëtonte njerëzit e kapur nga stuhia.
“Chevy vdiq duke iu përgjigjur thirrjes për të ndihmuar të tjerët,” tha shefi lokal i zjarrfikësve Terry Feth.
“I gjithë departamenti ynë është i pikëlluar, ndërsa ne vajtojmë me familjen, miqtë dhe shokët tanë të pare, që përgjigjen gjatë kësaj kohe tepër të vështirë”, tha ai më tej.
Në Little Rock, Arkansas, një djalë 5-vjeçar u vra nga një pemë që ra në shtëpinë e tij, duke e shkatërruar atë.
Në Gjeorgji, baba dhe bir u vranë të dy të dielën teksa luanin golf. Sipas një raporti të mjekut, Matthew Terrell Collins Sr, 58 vjeç dhe Matthew Terrell Collins Jr, 29 vjeç, vdiqën kur një pemë ra në karrocën e tyre të golfit.
Një GoFundMe që filloi të mbledhë para për familjen Collins, përshkroi: “Ata po kalonin kohë së bashku kur goditi stuhia, duke ndarë një moment midis babait dhe djalit që pa e ditur do të bëhej i fundit i tyre”.
