Shtetet e Bashkuara të Amerikës po përdorin dronë vëzhgimi mbi Gaza në kërkim të pengjeve të marra nga Hamasi kur grupi militant palestinez sulmoi Izraelin më 7 tetor, thanë të enjten dy zyrtarë amerikanë.
Dy zyrtarët amerikanë, duke folur në kushte anonimiteti për Reuters, thanë se SHBA-ja po dërgonte dronë për mbledhjen e informacioneve të inteligjencës mbi Gaza për të ndihmuar në përpjekjet për gjetjen e pengjeve. Një nga zyrtarët tha se ata kishin kryer fluturimet me dron për më shumë se një javë.
Zyrtarët amerikanë kanë thënë se 10 amerikanë që mbeten të pagjetur mund të jenë në mesin e më shumë se 200 personave të marrë peng në Gaza, ku besohet se mbahen në rrjetin e gjerë të tuneleve të Hamasit.
Forcat izraelite të enjten rrethuan qytetin e Gazës – qytetin kryesor të Rripit të Gazës – në sulmin e tyre ndaj Hamasit, i cili rezistoi me sulme goditëse nga tunelet nëntokësore.
Qyteti në veri të Gazës është bërë fokusi i sulmit për Izraelin, i cili është zotuar të asgjësojë strukturën komanduese të grupit islamik dhe u ka thënë civilëve të ikin në jug.
Luftëtarët e Hamasit filluan një sulm të befasishëm në Izrael më 7 tetor, duke vrarë 1,400 njerëz, kryesisht civilë, sipas zyrtarëve izraelitë, në ditën më vdekjeprurëse të historisë 75-vjeçare të vendit.
Bombardimet hakmarrëse të Izraelit dhe ofensiva tokësore e enklavës së vogël palestineze prej 2.3 milionë banorësh ka vrarë të paktën 9,061 njerëz, sipas autoriteteve shëndetësore të Gazës./Opinion.al
