Shqipëria ka vendosur pro rezolutës së Këshillit të Sigurimit të OKB, e cila kërkonte një “pauzë humanitare” në konfliktin mes Izraelit dhe militantëve të Hamasit, për të lejuar hyrjen e ndihmave humanitare në Rripin e Gazës.
Nga ana tjetër, Shtetet e Bashkuara përdorën veto.
Rezoluta i mori 12 vota në favor në Këshillin e Sigurimit 15-anëtarësh, dy abstenime dhe kundërshtimin e SHBA-së.
Ambasadorja amerikane në OKB, Linda Thomas-Greenfield, tha pasi e përdori veton se presidenti amerikan Joe Biden e vizitoi rajonin të mërkurën për t’u angazhuar në diplomaci dhe “ne kemi nevojë që diplomacia të zhvillohet këtu”.
Ajo, po ashtu, e kritikoi rezolutën se nuk e përmendi të drejtën e Izraelit për t’u vetëmbrojtur.
Rezoluta u mbështet nga Rusia dhe Kina, të cilat e kritikuan SHBA-në për kundërshtimin e saj.
