Presidenti i SHBA-ve, Joe Biden, ka deklaruar të premten se ishte një “vendim i vështirë”, ai për t’i siguruar Ukrainës municione thërrmuese për herë të parë, por shtoi se ai ishte i bindur përfundimisht që të dërgonte armët e diskutueshme sepse Kievit i nevojiten municione në kundërofensivën ndaj Rusisë.
Shtëpia e Bardhë njoftoi të premten se presidenti kishte miratuar transferimin e municioneve thërrmuese në Ukrainë.
“Ishte një vendim shumë i vështirë nga ana ime. Dhe meqë ra fjala, unë e diskutova këtë me aleatët tanë, e diskutova këtë me miqtë tanë në Kodër,” tha Biden, duke shtuar: “Ukrainasve po u mbarojnë municionet.”
Municionet thërrmuese që SHBA-të do të dërgojnë në Ukrainë do të jenë të pajtueshme me obusët 155 mm, një pjesë kyçe e artilerisë që i ka lejuar Ukrainës të rifitojë territorin gjatë vitit të kaluar.
Biden i tha Zakarias se municionet thërrmuese po dërgoheshin si një “periudhë tranzicioni” derisa SHBA të jetë në gjendje të prodhojë më shumë artileri 155 mm.
“Kjo është një luftë në lidhje me municionet. Dhe atyre po u mbarojnë municionet,” tha Biden. “Dhe kështu, atë që bëra më në fund, mora rekomandimin e Departamentit të Mbrojtjes”-vijoi ai.
Ka më shumë se 100 vende, duke përfshirë Britaninë e Madhe, Francën dhe Gjermaninë, të cilët i kanë nxjerrë të jashtëligjshme municionet sipas Konventës për Municionet Thërrmuese. Por SHBA dhe Ukraina nuk janë nënshkruese të ndalimit./Opinion.al
